MUITALUS: Loga, mot eurohpalaš máhttinfierpmádagat doibmet geavadis
Ovdamearka eurohpalaš ovttasbarggus
Onni muitalus
Onni lea njealjijahkásaš bárdni, gii gillá lossa epileptalaš dohppehallamiin. Onnii dahket seassamiid ja dutkamiid, main čielgá, ahte dávdamearkkaid dagaha hárvenaš šattalmas vuoiŋŋamaččain. Onni jearrá rávvaga váttes epilepsiijaide vuojulduvvan eurohpalaš máhttinfierpmádagas.
Onni dáhpáhus gieđahallojuvvo EU-máhttinfierpmádagas. Áššedovdit Eurohpa sierra guovlluin árvvoštallet ovttas, mii livččii buoremus dikšunvuohki Onni epilepsiijai. Dikšunvuohkin válljejuvvo čuohpadus, man teknihkalaš máhttin lea buoremus Fránkriikka Marseilles. Onni mátkkoštanai iežas váhnemiiguin Fránkriikii čuohpadussii. Čuohpadusa maŋŋel Onni dohppehallamat leat geahppánan ja váhkkaseapmi joatkahuvvá.
Gáldu: Eurohpa komisšuvdna – Audiovisuála bálvalusat
Eurohpalaš máhttinfierpmádagaid doaimma vuođđu
Eurohpa komisšuvdna lea vuođđudan eurohpalaš máhttinfierpmádagaid doaktáriid veahkkeneavvun álkidahttit hárvenaš dávddaid buhcciid diagnoserema ja dikšuma. Fierpmádagaide gullet doaktárat, geat dikšot hárvenašdávddaid sihke eará suorggi ámmátolbmot Eurohpa sierra guovlluin.
Buohcci miehtamiin doavttir, gii su dikšu, sáhttá dárbbu mielde váldit oktavuođa eurohpalaš máhttinfierpmádagaide ja atnit ávkin iešguđege riikkaid doaktáriid máhttima. EU-komisšuvdna lea gárgehan oktavuođa váldima gaskaoapmin diehtodorvvolaš konsultašuvdnavuoláža, mii dahká vejolažžan fierbmevuostáváldimiid doallama. Konsultašuvnna lassin buohcci sáhttá dihto dáhpáhusain dikšojuvvot maid nuppi EU-riikkas. Dalle buohccái sáhttá ohccojuvvot juogo ovdalohpi Kelas dehe buohcceviesut sáhttet ordnet dikšuma buohcceviesuidgaskasaš oastinbálvalussan.