Báberkeahtes olbmuid buohccedikšun Suomas

Suomas orrot lágalaččat ja lágaheamit olbmot, geain adnojuvvo oppalaš namahussan báberkeahtes olbmot. Báberkeahtes olbmuin lea vuoigatvuohta hohpolaš dikšumii almmolaš dearvvašvuohtafuolahusas. Gielda sáhttá iežas mearrádusain addit báberkeahtes olbmui maid hohpolaš dikšuma viiddit dikšuma. Dasa lassin Global Clinic fállá nuvttá dearvvašvuohtabálvalusaid báberkeahtes olbmuide.


Báberkeahtes olbmuin lea vuolggasaji mielde riekti dušše hohpolaš dikšumii Suoma almmolaš dearvvašvuohtafuolahusas. Báberkeahtes olbmos lea dábálaččat alddis ovddasvástádus Suomas ollašuvvan buohccedikšuma goluin. Jos hohpolaš almmolaš dearvvašvuohtafuolahusa dikšungolut eai oažžašuva berrojuvvot olbmos alddis, Kela buhtte daid almmolaš dearvvašvuohtafuolahusa doalaheaddjái. Gielda sáhttá iežas mearrádusain addit báberkeahtes olbmui maiddái hohpolaš dikšuma viiddit dikšuma. Ná lea dahkkojuvvon ovdamearkka dihte Helssegis, Espoos ja Jyväskyläs.

Global Clinic (suomagillii) fállá dearvvašvuohtabálvalusaid nuvttá báberkeahtes olbmuide. Klinihkat doibmet Helssegis, Turkus, Oulus ja Joensuus, ja dain barget eaktodáhtolaš doaktárat ja dikšunbargit. Áššehasat sáhttet dikšut áššiideaset klinihkas almmá dan haga, ahte sii galget duođaštit identitehtaset, ja sin áššiid dikšun bissu luhtolažžan. Klinihka čujuhus lea suollemas ja dat muitaluvvo, go válddát oktavuođa klinihkkii.

Báberkeahtes olbmuin dárkkuhuvvojit máŋggat sierra olmmošjoavkkut, iige terminologiija leat stáđásnuvvan. Dábálaččat báberkeahtes olmmožin dárkkuhuvvojit buohkat dehe muhtimat čuovvovaš olmmošjoavkkuin

  • riikkas almmá orodanlobi haga orodeaddji eará olmmoš, gii boahtá eará báikkis go EU- dehe Eeg-riikkas dehe Šveiccas, ja gean orodanlohpeáigi lea dievvan dehe riikiiboahtimii eai leat leamaš dehe riikkas orodeapmái eai leat lágalaš eavttut
  • Supmii stuđerenulbmilis eará báikkis go EU- dehe Eeg-riikkas dehe Šveiccas boahtán olmmoš, gean orodanlobi eaktun lea leamaš priváhta buohcanoadju, muhto oadjodorvu lea nohkan dehe dat ii govčča dárbahassii bures
  • EU-riikkavuloš, gean riikkas orrun lea lágalaš, muhto geas ii leat oadjodorvu buozalmasa dehe buohccedikšuma várás.