Stuđeantan dehe dutkin Supmii

Jos boađát stuđerit Supmii, de sáhtát atnit skuvla- dehe stuđerendearvvašvuohtafuolahusa bálvalusaid. Skuvla- ja stuđeantadearvvašvuohtafuolahusa bálvalusat fállojuvvojit buohkaide oahppolágádusa váldodoaibmasaš skuvlamánáide ja stuđeanttaide, geat čađahit dutkosa. Dus sáhttá leat vuoigatvuohta maid atnit Suoma almmolaš ja priváhta dearvvašvuohtafuolahusa bálvalusaid.


Skuvla- ja stuđerendearvvašvuohtafuolahus doallá sisttis

  • dearvvašvuohtadárkkástusaid
  • dearvvašvuohtabálvalusaid
  • vuođđodearvvašvuohtafuolahusa buohccedikšunbálvalusaid

Oahppovázzin vuođđoskuvllas, logahagas dehe ámmátskuvllas

Gielda, gos oahppolágádus lea, ordne skuvla- ja oahppovázzindearvvašvuođa fuolahusa bálvalusaid. Skuvla- ja oahppovázzindearvvašvuohtafuolahus ordnejuvvo dábálaččat skuvlla sajiin.

Allaskuvllas stuđerejeaddji dearvvašvuohtafuolahus

Ylioppilaiden terveydenhoitosäätiö (YTHS) sámás: Stuđeanttaid dearvvašvuohtadikšunvuođđudus (SDDV) ordne stuđeantadearvvašvuohtafuolahusa bálvalusaid universiteahtaid ja ámmátallaskuvllaid stuđeanttaide. Sáhtát geavahit SDDV bálvalusaid, juos čađahat dutkosa ámmátallaskuvllas dehe universiteahtas ja don leat ilmmuhan iežat lohkanbadjái mieldeorrun. Juohke SDDV bálvalusaide vuoiggalaš allaskuvlastuđeanta máksá dearvvašvuohtamávssu Kelai. Váldde vuhtii, ahte don leat geatnegahtton máksui, vaikko čađahivččet dutkosa gáiddusin olgoriikkain, juos don leat ilmmuhan iežat lohkanbadjái mieldeorrun. SDDV fállá stuđeanttaide maid šleađggalaš bálvalusaid ja gáiddusvuostáváldinbálvalusaid, maid stuđeanttat, geat orrot olgoriikkain, sáhttet geavahit. Lassidiehtu mávssu máksimis gávnnat Kela siidduin (suomagillii).

Juos don leat Supmii boahtti lonohallanstuđeanta, dus ii leat vuoigatvuohta geavahit SDDV bálvalusaid. Juos boađát stuđeantalonohallin EU-guovllus, Stuora-Británnias, Austrálias dehe Kanada Quebecis, don leat vuoiggalaš dálkkasdieđalaččat vealtameahttun dikšumii almmolaš dearvvavuohtafuolahusas. Eará riikkain boahtti stuđeantalonohallit dárbbahit priváhta buohcangollodáhkádusa.

Du vuoigatvuohta atnit Suoma almmolaš dehe priváhta dearvvašvuohtafuolahusa

Jos boađát Supmii stuđeantan dehe dutkin nuppi EU- dehe Eeg-riikkas, Šveiccas, Stuora-Británnias, Austrálias dehe Kanada Quebecis, de oaččut dikšuma almmolaš dearvvašvuohtafuolahusas ja buhtadusaid Kelas priváhta dearvvašvuohtafuolahusa, dálkasiid ja mátkkiid goluide.

  • Jos boađát EU- dehe Eeg-riikkas dehe Šveiccas čájet iežat vuoigatvuođa dikšumii almmolaš dearvvašvuohtafuolahusas Eurohpalaš buohccedikšungoarta. Goarttain oaččut dálkkasdieđalaččat vealtamehttun dikšuma, dehege dakkár dikšuma, mii ii sáhte doaktára árvvoštallama mielde vuordit du ruoktotmáhccama. Suoma orodeamát bistin váikkuha dasa, man viiddes dikšun sáhttá addojuvvot.
  • Juos don boađát Stuora-Británnias ja dus lea Stuora-Británnia mieđihan iežas stuđeanttaid dikšunriekteduođaštus, don oaččut dainna dálkkasdieđalaččat vealtameahttun dikšuma almmolaš dearvvašvuohtafuolahusas. Goarttas galgá leat Suoma riikadovddaldat (FI).
  • Jos boađát Kanada Quebecis, registrere iežat buohcceoadjolágádusa mieđihan duođaštusa Kelai. Oaččut Kelas duođaštusa, mainna čájáhat iežat vuoigatvuođa dikšumii Suoma almmolaš dearvvašvuohtafuolahusas.
  • Jos boađát Austrálias, čájet iežat vuoigatvuođa dikšumii almmolaš dearvvašvuohtafuolahusas Austrália pássain. Du fásta orrunčujuhussat galgá leat Austrálias.

Jos boađát Supmii stuđeantan eará sajes go EU- dehe Eeg-riikkain, Šveiccas, Stuora-Británnias, Austrálias dehe Kanada Quebecis, de dus galgá leat priváhtadáhkádus dearvvašvuohtafuolahusa ja dálkkasdikšuma goluid várás. Gustojeaddji dáhkádus lea eaktun orodanlobi oažžumii. Oaččut almmolaš dearvvašvuohtafuolahusas hohpolaš dikšuma, man goluid govččat ieš. Dasa lassin sáhtát atnit priváhta dearvvašvuohtafuolahusa bálvalusaid iežat goasttadusaiguin. Maiddái dáhkádus sáhttá gokčat du goluidat.

Jos stuđeret iežat lohkamiid olis, de dat sáhttá váikkuhit dikšunvuoigatvuođaidasat

Ilmmut Kelai, jos stuđeret lohkamiiddat olis. Kela čielggada, mat leat du dikšunvuoigatvuođat. Ovdamearkka dihte eará sajes go EU- dehe Eeg-riikkain Šveiccas, Stuora-Británnias, Austrálias dehe Kanada Quebecis boahtti goalmmát riikkaid riikkavuložat, geain lea Suomas bargamii rievtti addi orodanlohpi ja gustojeaddji bargosoahpamuš, leat vuoiggalaččat Suoma almmolaš dearvvašvuohtafuolahusa bálvalusaide.

Veahkkeruhtadutki – čielggat iežat vejolašvuođaid gullat Suoma sosiáladorvui

Jos barggat Suomas veahkkeruhtadutkin, oaččut dieđu vuoigatvuođastat Suoma sosiáladorvui Kela siidduin. Ovdamearkka dihte eará sajes go EU- dehe Eeg-riikkain, Šveiccas, Stuora-Británnias, Austrálias dehe Kanada Quebecis boahtti goalmmát riikkaid riikkavuložat, geain lea dutki orodanlohpi, sáhttet boahtit oadjuduvvot Suomas buohcama várás. Go leat oadjuduvvon buohcama várás, de sáhtát atnit almmolaš dearvvašvuohtafuolahusa ja oažžut priváhta dearvvašvuohtafuolahusa geavahusas Kela-buhtadusaid.