Dearvvašvuohtafuolahusa bearráigeahčču Suomas
Suomas dearvvašvuohtafuolahusa doaimma bearráigehččet Sosiála- ja dearvvašvuohtafuolahusa lohpe- ja gozihanvirgedoaimmahat (Valvira) sihke guovlohálddahusa virgedoaimmahagat. Dálkkassuorggi gozihaneiseváldi lea Fimea. Dasa lassin dearvvašvuohtafuolahusa organisašuvnnat leat ieža geatnegahtton bearráigeahččat iežaset doaimma.
Valvira oahpista ja bearráigeahččá dearvvašvuohtafuolahusa ámmátolbmuid ja doaibmaovttadagaid barggu sihke almmolaš ja priváhta dearvvašvuohtafuolahusas. Valvira bargun lea
- doallat bajás registara dearvvašvuohtafuolahusa ámmátolbmuin
- gieđahallat guoddaleami dalle, go dikšunmeattáhus eahpiduvvo váikkuhan buohcci jápmimii dehe váttes lápmahuvvamii (eará dáhpáhusas guoddalusa gieđahallá guovlohálddahusvirgedoaimmahat)
- bearráigeahččat dikšundáhkádusa mearreáiggiid ollašuvvama.
Valvira mieđiha čuovvovaš lobiid
- lobiid ámmátbarganvuoigatvuođaid dearvvašvuohtafuolahusa ámmátolbmuide
- lobiid priváhta dearvvašvuohtafuolahusa bálvalusaid buvttadeapmái dalle, go doaibman lea máŋgga guovlohálddahusa virgedoaimmahaga guovllus (eará dáhpáhusas lobi mieđiha guovlohálddahusa virgedoaimmahat)
- gođuslobiid (olbmuid, eallagiid, gođđosiid ja seallaid dálkkasdieđalaš atnu)
- Lobiid áhpehisvuođa gaskkalduhttimii ja steriliseremii dihto dáhpáhusain.
Guovlohálddahusa virgedoaimmahagat oahpistit ja bearráigehččet dearvvašvuohtafuolahusa bálvalanbuvttadeddjiid gielddain
Guovlohálddahusa virgedoaimmahat mieđiha lobi priváhta sosiála- ja dearvvašvuohtafuolahusa doibmii dalle, go doaibman lea dušše ovtta gieldda dehe ovtta guovlohálddahusa virgedoaimmahaga guovllus. Dan lassin guovlohálddahusa virgedoaimmahat gieđahallá guoddalusaid sihke njulgen- ja váidalanáššiid ja neavvu áššehasa, jos bálvalusain dehe daid šlájas leat áššehasa mielas duođalaš váillit.
Dearvvašvuohtafuolahusa bargoaddi galgá bearráigeahččat iežas doaimma
Dearvvašvuohtafuolahusa bargoaddiin lea vuosttaš ovddasvástádus bearráigeahččat iežas doaimma. Bargoaddi galgá bearráigeahččat ovdamearkka dihte bargiid, sajiid ja apparáhtaid. Almmolaš dearvvašvuohtafuolahusa doaibmaovttadagas galgá leat plána šládjahálddašeamis ja buohccedorvvolašvuođas.
Almmolaš dearvvašvuohtafuolahusa doaimma bearráigehččet maid gielddaid ja gieldaovttastumiid dárkkistanlávdegottit. Daid bargun lea árvvoštallat gieldda dehe gieldakonsearnna ekonomalaš ja doaibmaulbmiliid ollašuvvan. Dárkkistanlávdegoddi raportere iežas fuomášumiin gieldda dehe buohccedikšunbiirre gieldaovttastumi alimus stivrii.
Priváhta dearvvašvuohtafuolahusa fitnodagas galgá leat lohpi iežas doibmii
Priváhta dearvvašvuohtafuolahusa fitnodagas galgá leat lohpi iežas doibmii. Lobi mieđiha dat guovlohálddahusa virgedoaimmahat, man guovllus fitnodat doaibmá. Jos fitnodat doaibmá máŋgga guovlohálddahusa virgedoaimmahaga guovllus, lobi mieđiha Valvira.
Priváhta dearvvašvuohtafuolahusa bálvalanbuvttadeddjiin galgá dasa lassin leat iešgohcinplána, gč. suomagiel liŋkka omavalvontasuunnitelma. Plánas govviduvvojit earret eará fitnodaga doaibmajurdda sihke áššit, mat laktásit bargiid máhttui, sajiide ja buohccedorvvolašvuhtii. Bálvalanbuvttadeaddjis galgá leat lohpeeiseválddi dohkkehan hoavda, gean ovddasvástádussan leat dearvvašvuohtabálvalusat ja dat, ahte doaibma deavdá lága gáibádusaid.
Fimea bearráigeahččá dálkkassuorggi
Dálkkassuorggi dorvvolašvuohta- ja ovddidanguovddáš Fimea bearráigeahččá Suomas dálkasiid, varra- ja gođusbuktagiid sihke ovddida dálkkassuorggi. Virgedoaimmahaga bargguide gullet dasa lassin dálkkassuorggi lohpe- ja dutkanbarggut sihke dálkkasdieđu buvttadeapmi ja gaskkusteapmi. Fimea earret eará mieđiha doaibmalobiid apteaikkaide ja čuovvu dálkasiid árrováikkuhusaid.