Kontáktačuokkis skuvle rájiid rasttildeaddji dearvvašvuohtafuolahusas
30.10.2025
Rájiid rasttildeaddji dearvvašvuohtafuolahusa kontáktačuokkis pláne bárrahiin skuvlenollisvuođa riikkaidgaskasaš buohccedikšuma fáttáin. Skuvlenmateriálat leat čuozihuvvon vuohččan olbmuide, geat barggusteaset deivet rájiid rasttildeaddji dearvvašvuohtafuolahusa áššiid. Mii leat váldán vuhtii buresbirgenguovlluin ja buohcceorganisašuvnnain bargiid oaiviliid skuvlemiid plánemis.
Manin kontáktačuokkis skuvle?
Rájiid rasttildeaddji dearvvašvuohtafuolahusa kontáktačuoggá bargun lea juohkit dieđu dearvvašvuohtabálvalusaid geavaheamis riikkaidgaskasaš diliin. Persovdnaáššehasaid lassin neavvut maid dakkár olbmuid, geat barget dáiguin áššiiguin, dego dearvvašvuohtafuolahusa ámmátolbmuid.
Mii leat ovdalge bivdaga vuođul ordnen skuvlendilálašvuođaid sierra čanusjoavkkuideamet sihke persovdnaáššehasaide. Dál kontáktačuokkis pláne viiddit skuvlenollisvuođa, mii doallá sisttis maid videomateriála.
Ordniimet čanusjoavkkuideamet čakčat 2024 seminára ja bargobáji, man fáddán lei buhcciid diđolašvuođa lasiheapmi rájiid rasttildeaddji dearvvašvuohtafuolahusas. Bargobájis bođii ovdan, ahte ovdamearkka dihte buresbirgenguovlluid bargiide livččii dehálaš lágidit skuvlemiid dáin fáttáin, vai sii máhtále buorebut neavvut iežaset áššehasaid. Oasseváldit sávve skuvlemiid earenoamážit vuođđodearvvašvuohtafuolahussii.
Doarjjan jearahallandutkamuš buresbirgenguovlluide ja buohcceorganisašuvnnaide
Skuvlenollisvuođa plánema váste gártiimet 2025 miessemánu jearahallandutkamušain buresbirgenguovlluid ja buohcceorganisašuvnnaid bargiid sávaldagaid skuvlemiid váste. Oaččuimet jearahallamii oktiibuot 86 vástádusa, main 82 ledje buresbirgenguovlluin ja 4 buohcceorganisašuvnnain. Anonyma jearahallama vástideddjiid searvvis ledje ovdamearkka dihte divššárat, doaktárat, hálddahusa bargit ja hoavddat.
Fáttáid oasil jearahallamii vástideaddjit muosáhe dárbbu skuvlemiidda, maid fáddán lea almmolaš diehtu rájiid rasttildeaddji dearvvašvuohtafuolahusas. Maid Supmii muotku buohcci riekti dikšumii sihke mátkkošteaddji dearvvašvuohtafuolahus beroštahtii vástideddjiid.
Vástideddjiin eatnasat sávve Teams-skuvlemiid, mat ordnejuvvojit gáiddusin, ja furkejuvvon skuvlemiid materiálaid. Maid oanehit skuvlenvideoide lei guottáhus. Máŋga vástideaddji deattuhe, ahte buresbirgenguovlluin dárbbahuvvojit čielga rávvagat ja ovdamearkkat.
Almmustuhttit skuvlenvideoid boahtte jagi
Kontáktačuokkis pláne bárrahiin skuvlenvideoid sisdoalu ja hámi. Almmustuhttit vuosttaš skuvlenvideoid jagi 2026. Jearahallama bohtosiid vuođul leat mearridan álggahit skuvlemiin, mat gusket almmolaš dieđu rájiid rasttildeaddji dearvvašvuohtafuolahusa áššiin.
Váldit viidáseappot vuostá sávaldagaid ja evttohusaid skuvlenollisvuođaid sisdoaluin. Don sáhtát leat midjiide oktavuođas šleađgaboasttain yhteyspiste@kela.fi.