Rájiid rasttildeaddji dearvvašvuohtafuolahusa kontáktačuoggát bálvalit juohke EU-riikkas

Juohke EU-riikkas doaibmá unnimusat okta rájiid rasttildeaddji dearvvašvuohtafuolahusa kontáktačuokkis, mii addá dieđu iežas riikkas dehe guovllu dearvvašvuohtafuolahusa bálvalusain ja daid geavaheamis. Kontáktačuoggát fállet dieđu fierbmesiidduineaset ja eatnasat bálvalit áššehasaideaset šleađgaboastta dehe telefovnna bakte.

Jos dus lea beroštupmi diehtit Ruoŧa dearvvašvuohtabálvalusain, de jeara dain Ruoŧa kontáktačuoggás.

Sierra riikkaid kontáktačuoggáin sáhtát jearrat neavvaga, jos plánet iežat mátkkoštit dikšuma várás nuppi EU- dehe Eeg-riikii. Sáhtát jearrat maid ráđi, jos buohccát go leat mátkkistat ja ozat ovdamearkka dihte čalbmedoaktára. Jos hálidat diehtit muhtin dihto riikka riikka dearvvašvuohtabálvalusain, ovdamearkka dihte leago bálvalusfálli almmolaš vai priváhta, dehe makkár kvaliteahttakritearat riikka dearvvašvuohtabálvalusain čuvvojuvvojit, de jeara dáin áššiin čuozáhatriikka kontáktačuoggás. Čuozáhatriikka kontáktačuokkis máhttá maid muitalit gávdnogo muhtin dihto dálkkas gažaldatvuloš riikkas, dehe mot riikkas geavvan dikšunmeattáhusain galggašii meannudit. Kontáktačuoggá oktavuohtadieđut gávnnat .

Buhtadusgeavadiin ja dikšunvuoigatvuođaiguin veahkeha Suoma kontáktačuokkis

Jos hálidat diehtit, makkár vuoigatvuođat dus leat oažžut divššu nuppi EU-, Eeg-riikkas ja Šveiccas ja mainna vugiin Suopma buhtte dearvvašvuohtabálvalusaid geavahusa olgoriikkain, de váldde oktavuođa Suoma Rájiid rasttildeaddji dearvvašvuohtafuolahusa kontáktačuoggái. Kontáktačuokkis neavvu almmolaš dásis. Don sáhtát almmatge maid jearrat olgoriikkaide dikšuma várás ohcaleamis, goas kontáktačuokkis oahpista dáin gažaldagain rievttes eiseválddiid lusa. Seamma ládje Suoma kontáktačuokkis neavvu olgoriikkain Supmii boahttiid Suoma dearvvašvuohtabálvalusaid geavahusas.

Sáhtát maid oahpásnuvvat Dikšunbáiki.fi-siidduid riikagovvádusaide, main muitaluvvo almmolaš dásis sierra riikkaid dearvvašvuohtabálvalusain. Fierbmesiidduide lea čohkkejuvvon diehtu badjel 50 riikka dearvvašvuohtabálvalusain, maiddái EU-, Eeg-riikkaid ja Šveicca olggobealde.

Kontáktačuoggát dahket ovttasbarggu ja deaivvadit jeavddalaččat

Kontáktačuoggát deaivvadit nuppiideaset jeavddalaččat ja maŋimus čoahkkin dollojuvvui Brysselis njukčamánus. Kontáktačuoggáid ovttasbarggu koordinere Eurohpa komisšuvnna Dearvvašvuođa ja biebmodorvvolašvuođa váldoossodat SANTE. Komisšuvdna čuovvu ja viggá ovddidit buohccedirektiivva ollašuvvama. Njukčámánu deaivvadeamis komisšuvdna muitalii, mot juohke riikka kontáktačuoggá fierbmesiiddut ledje mannon čađa. Dasa lassin komisšuvdna muitalii mystery shoppingis, mas govahallon áššehasat jerre neavvagiid kontáktačuoggáin šleađgaboastta ja telefuvnna bakte mannan čavčča. Suopma birgehalai goappánai deasttas bures.

Kontáktačuoggá bajasdoallan Dikšunbáikkiválljen.fi-fierbmebálvalus oaččui giittosa ee. gokčevaš buhtadusdieđuin. Suopma lea ovddasmanni maiddái somes, daningo easka viđa EU-riikka kontáktačuoggás lea iežas Twitter-kontu. Suoma kontáktačuoggá Twitter-konttu sáhtát čuovvut namain @rajayhteyspiste.