Eurohpalaš buohccedikšungoarta
Mii lea eurohpalaš buohccedikšungoarta ja gos dan oažžu?
Eurohpalaš buohccedikšungoarta (European Health Insurance Card, EHIC) lea goarta, mii lea anus EU- ja Eeg-riikkas, Šveiccas, Stuora-Británnias ja Davvi-Irlánddas. Go čájehat goartta, de oaččut dálkkasdieđalaččat vealtameahttun dikšuma seamma ládje ja seamma haddái go báikkálaš orrut.
Dálkkasdieđalaččat vealtameahttun dikšumiin dárkkuhuvvo dakkár dikšun, mii ii sáhte vuordit du ruoktot máhccama. Goartta gokčan dikšumii gullá fáhkkestaga buohccáma dehe bártti lassin ovdamearkka dihte guhkesáigge buozalmasa dehe dikšun, mii gáibiduvvo áhpehisvuođa olis.
Eurohpalaš buohccedikšungoarta lea nuvttá. Sáhtát ohcat goartta dábálaččat iežat orrunriikka buohcanoadjolágádusas. Suomas goartta mieđiha Kela (suomagillii). Oahpásnuva maid Kela dávjá jerrojuvvon gažaldagaide eurohpalaš buohccedikšungoarttas (suomagillii).
Masa mun dárbbahan eurohpalaš buohccedikšungoartta, juos mus lea mátkedáhkádus?
Eurohpalaš buohccedikšungoarta ja mátkedáhkádus dievasmahttet nubbi nuppi. Eurohpalaš buohccedikšungoarttain mávssát dikšumis dušše báikkálaš áššehasmávssu. Almmá goartta haga šattat máksit visot dikšungoluid vuohččan ieš. Eurohpalaš buohccedikšungoarttain oaččut mátkki áigge maiddái ovdamearkka dihte guhkesáigge buozalmassii dehe áhpehisvuhtii dálkkasdieđalaččat vealtameahttun dikšuma, mii ii vealttakeahttá gula mátkedáhkádussii.
Priváhta mátkedáhkádusa gánnáha goitge doallat, daningo Eurohpalaš buohccedikšungoarta ii govčča ovdamearkka dihte ambulánsagirdimiid dehe eará máhccanmátkki sierraordnedemiid. Muittáthan dárkkistit iežat mátkedáhkádusa eavttuid ovdal mátkki.
Maid barggan, juos mus bivdojuvvo buohcceviesus eurohpalaš buohccedikšungoarta iige mus leat dat?
Dávjá dikšuma oažžu heahtedáhpáhusas almmá goartta haganai. Váldde oktavuođa Kela riikkaidgaskasaš áššiid guovddážii (suomagillii), mii sáhttá váfistit, gulatgo Suoma buohcanodjui, dehe dan, ahte Suomas lea ovddasvástádus du dikšuma goluin. Kela doaimmaha dutnje dehe njuolga buohccevissui gaskaboddasaš duođaštusa, mii buhtte goartta.
Juos don it oaččo dikšuma báikkálaš áššehasmávssu hattiin, muhto šaddat máksit dikšuma duođalaš goluid ieš. Don sáhtát ohcat dikšumis buhtadusaid Kelas (suomagillii) maŋálgihtii.
Nabe juos buohcceviessu ii dohkket eurohpalaš buohccedikšungoartta?
Eurohpalaš buohccedikšungoarta heive EU- ja Eeg-riikkaid, Šveicca, Stuora-Británnia ja Davvi-Irlándda almmolaš dearvvašvuohtafuolahusas dehe almmolaš dearvvašvuohtafuolahusain soahpamuša dahkan dikšunaddiin. Juos dikšunaddi ii dohkket eurohpalaš buohccedikšungoartta ja šattat ieš máksit dikšuma duođalaš goluid, sáhtát ohcat buhtadusa dikšungoluide maŋálgihtii juogo Kelas (suomagillii) dehe dikšuma addán riikka buohcanoadjolágádusas.
Manin eurohpalaš buohccedikšungoarta lea suomagielalaš?
Juohke riika mieđiha ieš goartta iežas virggálaš gielain. Kela mieđiha eurohpalaš buohccedikšungoartta suoma- dehe ruoŧagielalažžan. Goarta lea seammalágán eará riikkain, dušše giella molsašuddá.