Dearvvašvuohtafuolahusa bearráigeahčču Suomas
Suomas dearvvašvuohtafuolahusa bearráigeahččá Lohpe- ja bearráigeahččovirgedoaimmahat. Dálkkassuorggi gozihaneiseváldi lea Fimea. Dasa lassin dearvvašvuohtafuolahusa organisašuvnnat leat ieža geatnegahtton bearráigeahččat iežaset doaimma.
Lohpe- ja bearráigeahččovirgedoaimmahat stivre ja bearráigeahččá dearvvašvuohtafuolahusa ámmátolbmuid ja doaibmaovttadagaid barggu sihke almmolaš ja priváhta dearvvašvuohtafuolahusas. Doaimmahaga bargun lea
- bajásdoallat registara dearvvašvuohtafuolahusa ámmátolbmuin (suomagillii) sihke bálvalanbuvttadanregistara Sotera (suomagillii)
- gieđahallat sosiála- ja dearvvašvuohtafuolahusa guoddalusaid
- bearráigeahččat dikšundáhkádusa mearreáiggiid ollahuvvama.
Lohpe- ja bearráigeahččovirgedoaimmahat mieđiha čuovvovaš lobiid
- ámmátbarganrivttiid dearvvašvuohtafuolahusa ámmátolbmuide
- lobiid priváhta dearvvašvuohtafuolahusa bálvalusaid buvttadeapmái
- lobiid áhpehisvuođa gaskkalduhttimii ja sterileremii dihto dáhpáhusain.
Dasa lassin Lohpe- ja bearráigeahččovirgedoaimmahat gieđahallá guoddalusaid ja neavvu áššehasaid, juos bálvalusain dehe daid kvaliteahtas leat áššehasa mielas duođalaš váilevašvuođat.
Dearvvašvuohtafuolahusa bálvalanfáladeaddji galgá bearráigeahččat iežas doaimma
Dearvvašvuohtafuolahusa bálvalanfáladeaddjis lea vuosttaš saji ovddasvástádus bearráigeahččat iežas doaimma. Bargoaddi galgá bearráigeahččat ovdamearkka dihte bargiid, sajiid ja biergasiid. Buresbirgenguovlluid ja eanet go ovtta bálvalanovttadagas bálvalusaid addi priváhta bálvalanbuvttadeaddjit galget ráhkadit iežaset ovddasvástádussii gullevaš bargguin ja bálvalusain iešbearráigeahččoprográmma.
Almmolaš dearvvašvuohtafuolahusa barggu bearráigehččet maid buresbirgenguovlluid dárkkistanlávdegottit. Daid bargun lea árvvoštallat buresbirgenguovlluid ekonomalaš ja funktionála ulbmiliid ollahuvvama.
Priváhta dearvvašvuođa fuolahusa fitnodagas galgá leat lohpi iežas doibmii
Priváhta dearvvašvuohtafuolahusa fitnodagas galgá leat lohpi iežas bargui. Lobi mieđiha Lohpe- ja bearráigeahččovirgedoaimmahat.
Priváhta bálvalanbuvttadeaddjis galgá leat lohpeeiseválddi dohkkehan hoavda, geas lea ovddasvástádus dearvvašvuohtabálvalusain ja das, ahte doaibma deavdá lága miel gáibádusaid.
Fimea bearráigeahččá dálkkassuorggi
Dálkkassuorggi dorvvolašvuohta- ja ovddidanguovddáš Fimea bearráigeahččá Suomas dálkasiid, dálkkodanrusttegiid, varra- ja gođusbuktagiid, biobáŋkkuid sihke ovdánahttá dálkkassuorggi. Virgedoaimmahaga bargguide gullet dasa lassin dálkkassuorggi lohpe- ja bearráigeahččobarggut, dutkan- ja ovdánahttinbarggut sihke dálkkasdieđu buvttadeapmi ja gaskkusteapmi. Fimea earret eará mieđiha doaibmalobiid apteaikkaide ja čuovvu dálkasiid árrováikkuhusaid.