EU-dearvvasvuodadiksun.fi 10 jagi – áššehasaideametguin huksejuvvon siiddut
16.10.2025
EU-dearvvasvuodadiksun.fi deavdá logi jagi golggotmánus 2025. Logijagi áigge siiddut leat ođasnuvvan ja ovdánan – álohii áššehasaid dárbbuid mielde. Ávvujagi gudnin guovlalit siidduid historjái ja ovdáneapmái.
Mas visot álggii?
Rájiid rasttildeaddji dearvvašvuohtafuolahusa fierbmesiiddut rahpase jagi 2015 namain Hoitopaikanvalinta.fi. Dat ledje vuosttaš riikkaviidosaš fierbmesiiddut, mat čohkkeje oktii dieđu sihke Suoma dearvvašvuohtabálvalusaid válljenfriddjavuođas ja rájiid rasttildeaddji dearvvašvuohtafuolahusas.
Jagi 2019 dieđut, mat guske Suoma dearvvašvuohtafuolahusa válljenfriddjavuođa fárreje Suomi.fi-fierbmebálvalussii. Hoitopaikanvalinta.fi-siiddut čieŋui oahpistit dearvvašvuohtafuolahusa riikkaidgaskasaš diliin. Áššehasaideamet bakte min siiddut ožžo ođđa nama EU-dearvvasvuodadiksun.fi, mii govvida buorebut dan riikkaidgaskasaš oaidninvuogi.
Diehtu dearvvašvuohtabálvalusain olgoriikkain ja Suomas
EU-dearvvasvuodadiksun.fi-siidduin juohkit áigeguovdilis ja luohtehahtti dieđu dearvvašvuohtabálvalusaid geavaheamis olgoriikkain ja Suomas. Oahpistit sierralágán diliin, ovdamearkka dihte go háliidat mátkkoštit dikšuma várás olgoriikkaide, dárbbašat dikšuma Suomas dehe háliidat diehtit iežat rivttiin ja geavadiin rájiid rasttildeaddji dearvvašvuohtafuolahusas. Muitalit maid, mot dikšumis oažžu buhtadusaid, dehe maid gánnáha váldit vuhtii dálkasiin mátkki áigge.
Siiddut doibmet njealji gillii: suoma-, ruoŧa-, eŋgelas- ja davvisámegillii. Dasa lassin leat čoahkkáigeasut deháleamos dieđuin suopmelaš ja suomaruoŧŧelaš seavagielain.
Sisdoallu olgoriikkaide mátkkošteddjiide ja Supmii boahttiide
Siidduideamet bivnnuheamos sisdoallu jagis nubbái leat riikkaguovdasaš dieđut badjel 30 riikka dearvvašvuohtafuolahusas. Riikkaguovdasaš dieđuin lea veahkki, juos buohccát olgoriikkain dehe plánet dikšuma nuppi riikkas. Lohkkiideamet beroštahttet maid gažaldagat, mat laktásit dálkasiid doalvumii ja fievrrideapmái mátkki olis, sihke dikšuma goluide ja buhtadusaide.
Suomas olgoriikkaide mátkkošteddjiid lassin min siiddut oahpistit maid Supmii boahtti áššehasaid ja doibmet diehtobáŋkun dearvvašvuohtafuolahusa ámmátolbmuide.
Siiddut ovdánit duojásii
Mii leat logi jagi áigge ođasnuhttán siidduid sisdoalu, ráhkadusa ja olgguldas hámi máŋgga háve. Min ulbmilin lea ráhkadit siidduin ovdalaččage čielgasit ja álkibun anihahtti. Áššehasaideamet sávaldagat leat oahpistan ovdánahttinbarggu: ovdamearkka dihte ovdasiiddu sisdoallu lea hábmejuvvon máhcahaga vuođul, ja siidduide leat lasihuvvon ođđa visuálalaš elemeanttat dieđu ovdanbuktima doarjjan.
Siidduid ovdánahttimis lea mielde áššehasráđđi, mii oassálastá earret eará jearahallamiidda, destemiidda ja bargobájiide.
Ovttasbargguin buoret bálvalus
EU-dearvvasvuodadiksun.fi-siidduid bajásdoallá ja ovdánahttá Rájiid rasttildeaddji dearvvašuohtafuolahusa kontáktačuokkis. Siidduid sisdoalu buvttadeamis ja ovdánahttinbarggus leat mielde min ovttasbargoguoimmit, dego Kela, Dearvvašvuođa ja buresbirgejumi lágádus sihke sosiála- ja dearvvašvuohtaministeriija.
EU-dearvvasvuodadiksun.fi-siidduid 10 jagi
2015 siiddut rabas
- Siiddut rahpase namain Hoitopaikanvalinta.fi
2016 davvisámegiella ja áigeguovdilis ođđasat
- Almmustuhtiimet siidduid davvisámegielalažžan (saame.hoitopaikanvalinta.fi)
- Válddiimet atnui áigeguovdilis artihkkaliid
- Almmustuhttigođiimet priváhta dearvvašvuohtafuolahusa haddedieđuid
2017 seavagiella ja áššehasjearahallan
- Almmustuhtiimet čoahkkáigeasuid suopmelaš ja suomaruoŧŧelaš seavagillii
- Gártiimet áššehasjearahallamiin sávaldagaid siidduid ovdánahttimii ja álggaheimmet ovdánahttinbargobájiid
2018 fáddásiiddut ja ovdamearkamuitalusat
- Almmustuhtiimet fáddásiidduid stuđeanttaide, Eurohpas mátkkošteddjiide ja olgoriikkaide dikšuma várás ohcaleddjiide sihke vuosttaš ovdamearkamuitalusaid
- Destiimet siidduid sisdoalu áššehasbargobájiin
2019 ođđa namma EU-dearvvasvuođadiksun.fi
- Siiddut čikŋo rájiid rasttildeaddji dearvvašvuohtafuolahusa gažaldagaide ja dat oaččui ođđa nama EU-dearvvasvuođadiksun.fi
- Suoma dearvvašvuođa fuolahusa válljenfriddjavuođa dieđut sirdáse suomi.fi-bálvalussii
2020 sisdoalloođastusat, ohcansátnereklameren ja analytihkka
- Buorideimmet siidduid olahahttivuođa ja almmustuhtiimet čilgehusa olahahttivuođas
- Ođasteimmet Dikšuma várás olgoriikkain Supmii -oasi ja siidduid, mat muitalit hárvenašbuozalmasaid fierpmádagain
- Álggaheimmet ohcansátnerekláma, vai siidduid lea álkit gávdnat
- Válddiimet atnui web-analytihka siidduid johtolaga čuovvumii
2021 sisdoalloođastusat ja giellagáhtten
- Ođasteimmet seavagielalaš osiid
- Čielggasmahtiimet sisdoalu ja giela sihke lasiheimmet oahpistemiid EU-komišuvnna Du Eurohpa -portálii
- Válddiimet atnui Siteimprove-reaiddu siidduid kvaliteahta čuovvumii
2022 dávjá jerrojuvvon, geavaheaddjijearahallan ja diehtočoahkkobánner
- Ođasteimmet ja dievasmahtiimet dávjá jerrojuvvon gažaldagaid oasi
- Čohkkiimet geavaheaddjijearahallamiin máhcahaga siidduin ja ávkkástalaimet bohtosiiguin ovdánahttinbarggus
- Válddiimet siidduin atnui diehtočoahkkobannera, man siidduin galledeaddji sáhttá addit iežas miehtama diehtočoahkuid atnui
2023 láhkanuppástus ja áššehasipmárdusbargu
- Muitaleimmet rájiid rasttildeaddji dearvvašvuohtafuolahusa láhkanuppástusas ja dan váikkuhusas dikšuma buhtadusaide
- Álggaheimmet áššehasipmárdusbarggu, man ulbmilin lea čoaggit dieđu sierra min áššehasjoavkkuin. Bohtosat veahkehit ovdánahttit min fierbmesiidduid ja kontáktačuoggá bálvalusa.
2024 ođđa visuálalaš geahčastat ja ođđa teknihkka
- Álggaheimmet siidduid sisdoaluid viidásit ođasnuhttima
- Destiimet siidduid áššehasráđis válljejuvvon fierbmesiidogeavaheddjiiguin
- Ođasteimmet siidduid almmustuhttinreaiddu
- Siiddut ožžo ođđa visuálalaš geahčastaga kontáktačuoggá brándaođastusa mielde
- Válddiimet atnui ođđa visuálalaš elemeanttaid, maiguin dieđut sáhttet ovdanbuktojuvvot čielgaseappot, ovdamearkka geasanasat, visuálalaš bálgát ja infogássat
2025 ovdasiidu ođasnuvvá ja sisdoalu čielggasmahttin joatkahuvvá
- Lonuheimmet neahttabalvavuloža
- Ođasteimmet ovdasiiddu sisdoalu ja ráhkadusa
- Siidduid sisdoalu čielggasmahttinbargu ovdána
Giitu, go leat mielde!
Ávvujagi mielde háliidit giitit buohkaid siidduideamet geavaheddjiid. Joatkit ovdánahttinbarggu, vai EU-dearvvasvuodadiksun.fi bálvala buorebut go ovdal – čielgasit, ipmirdahtti ládje ja váldá vuhtii áššehasaid dárbbuid.