Buohcceáššeovddasvástideaddji ovddida buohcci rivttiid ollahuvvama

Juohke dearvvašvuohtaguovddážis ja buohcceviesus lea buohcceáššeovddasvástideaddji, gii bargá buohcci rivttiid ovddideami várás. Buohcceáššeovddasvástideaddji bálvalusat leat nuvttá. Buohcceáššeovddasvástideaddji bargun lea neavvut ja veahkehit, juos ovdamearkka dihte don leat duhtameahttun iežat oažžun dikšumii dehe gieđahallamii. Buohcceáššeovddasvástideaddji sáhttá maid veahkehit du muittuhusa, guoddalusa dehe buohccevahátilmmuhusa dahkamis.

Buohcceáššeovddasvástideaddji ii sáhte váldit beali dálkkasdieđalaš dikšunmearrádusaide dehe dasa, leago dikšumis dáhpáhuvvan buohccevahát. Juos vávjját buohccevahága, sáhtát dahkat vahátilmmuhusa Buohccedáhkádusguovddážii. Oaččut buohcceáššeovddasvástideaddji kontáktadieđuid dárbbu mielde dan dearvvašvuohtaguovddážis dehe buohcceviesus, gos don leat dikšojuvvon.

Riikkabeivviid riekteáššeolmmoš bearráigeahččá maid dearvvašvuohtafuolahusa bargiid

Don sáhtát guoddalit riikkabeivviid riekteáššeolbmui, juos vávjját, ahte eiseváldi dehe virgeolmmoš ii leat doahttalan lága dehe deavdán geatnegasvuođaidis. Riekteáššeolbmo bearráigeahču ollái gullet maid eará almmolaš barggu dikšut, ovdamearkka dihte almmolaš dearvvašvuohtafuolahusa ámmátolbmot. Sáhtát guoddalit maid, juos vávjját, ahte vuođđo- ja olmmošrievttit eai leat ollahuvvan áššáigullevaččat.

Riekteáššeolmmoš ii sáhte nuppástuhttit eiseválddi dahkan mearrádusa. Riekteáššeolmmoš sáhttá dattetge iežas čilgehusa vuođul ovdamearkka dihte addit cuiggodusa dehe áššáskuhttit eiseválddi.

Guoddalus ii sáhte dahkkojuvvot badjel guokte jagi boares áššis dehe áššis, mas nuppástusohcan dehe duopmostuolu gieđahallan lea gaskan.