Gielalaš vuoigatvuođat

Dearvvašvuohtafuolahusa ámmátolbmot leat geatnegahtton addit áššehasaide dieđu su dearvvašvuohtadilis, dikšuma mearkkašumis, sierra dikšunmolssaeavttuin ja eará áššiin, mat laktásit dikšumii. Jos áššehasas ja dikšunbargoveagas ii leat oktasaš giella, ordnejuvvo dárbbu mielde dulkon.

Áššehasas lea Suomas álohii vuoigatvuohta oažžut nuvttá iežas dikšuma dieđuid.

Suomas dearvvašvuohtabálvalusat addojuvvojit suoma- ja ruoŧagillii

Suoma almmolaš dearvvašvuohtabálvalusat addojuvvojit Suoma virggálaš gielaiguin suoma- dehe ruoŧagillii. Láhka ii geatnegahte dikšunaddi fállat bálvalusaid eará gielaiguin.

Ovttagielalaš buresbirgenguovllu guovllus sosiála- ja dearvvašvuohtafuolahus ordnejuvvo buresbirgenguovllu gielain.

Guovttegielalaš buresbirgenguovlu galgá addit bálvalusaid áššehasa válljen gielain, suoma- dehe ruoŧagillii.

Dasa lassin sápmelaččain lea vuoigatvuohta geavahit sámegiela sápmelaččaid ruovttuguovllu gielddain sihke Sámi (Lappi) buresbirgenguovllu guovllus dakkár sosiála- ja dearvvašvuohtafuolahusa bálvalusain, mat buvttaduvvojit dušše doaibmaovttadagain, mat leat ruovttuguovllu gielddaid olggobealde.

Davviriikkalaččain lea vuoigatvuohta oažžut dearvvašvuohtabálvalusaid iežaset gielain

Davviriikkaid riikkavuložiin lea Davviriikkalaš sosiáladorvosoahpamuša vuođul vuoigatvuohta geavahit Suoma almmolaš dearvvašvuohtafuolahusas iežaset giela; suoma-, ruoŧa-, dáro-, dánskka- dehe islánddagiela. Dárbbu mielde almmolaš dearvvašvuohtafuolahus galgá ordnet dulkon- ja jorgalanveahki, go buohcci boahtá nuppi Davviriikkas.

Dulkongolut leat dikšungoluid oassi

Jos oaččut Suomas dikšuma almmolaš dearvvašvuohtafuolahusas ja buohccedikšumat goluid ovddasvástádus lea nuppi EU- dehe Eeg-riikkas dehe Sveiccas, berrojuvvo dulkoma dagahan goluin máksu dikšumat goluid oassin.

Jos ohcalat Supmii geavahit dearvvašvuohtabálvalusaid, don leat geatnegahtton ordnet iežat dárbbašan dulkoma dikšuma várás. Dearvvašvuohtafuolahusa bargit sáhttet ordnet dikšuma várás dulkonbálvalusaid, jos it ipmir iežat dikšuma dieđuid.

Jos dus leat alddát ovddasvástádus dikšumat goluin, du geatnegasvuohtan lea máksit maid dikšuma dulkongoluid.