Dikšunbáikkiválljen.fi ja Áel mielde mátkemeassain

Áel ja Rájiid rasttildeaddji dearvvašvuohtafuolahusa kontáktačuokkis oahpásnuhttiba eurohpalaš buohccedikšungoartta ja Dikšunbáikkiválljen.fi-fierbmebálvalusa mátkemeassain ossodagas 6p60.

Dikšunbáikkiválljen.fi-fierbmebálvalusas oažžu áigeguovdilis dieđu dearvvašvuohtabálvalusaid geavaheamis Suomas ja olgoriikkain. Siiddut veahkehit gažaldagain, mat laktásit dearvvašvuohtafuolahussii riikkaidgaskasaš diliin, ovdamearkka dihte jos buohccá báifáhkka olgoriikkain dehe mátkkošta buohccedikšumii nuppi riikii.

Áel:a mieđihan eurohpalaš buohccedikšungoarta lea Eurohpa mátkkiin ávkkálaš. Dan sáhttá diŋgot mátkemeassaid áigge njuovžilit Áel:a meassaossodagas 6p60. Nuvttá goartta gánnáha háhkat, daningo fáhkka buohccán dehe dáhpedorbmi olgoriikkamátkkis sáhttá muđuid šaddat divrrasin. Eurohpalaš buohccedikšungoartta leat háhkan juo 1,7 miljovnna suopmelačča.

Buohccedikšun olgoriikkain beroštahttá

– Dikšunbáikki.fi-siiddut leat dárkkuhuvvon veahkkin, go mátkkoštat olgoriikkain ja buohccát fáhkkestaga dehe go hálidat mátkkoštit olgoriikkaide geavahit dearvvašvuohtabálvalusaid, muitala kontáktačuoggá hoavda Marika Lahtivirta. – Siidduin lea mátkkošteaddjái ávkkálaš diehtu ovdamearkka dihte badjel 50 riikka dearvvašvuohtafuolahusa bálvalusain.

Siidduid lea álki geavahit mátkkiin maid mátketelefovnnain dehe tableahtain. Seamma sisdoallu lea oažžumis suomagiela lassin ruoŧagillii (www.vardenhetsval.fi), eŋgelasgillii (www.choosehealthcare.fi) ja davvisámegillii (saame.hoitopaikanvalinta.fi).

Rájiid rasttildeaddji dearvvašvuohtafuolahusa kontáktačuokkis neavvu nu dearvvašvuohtabálvalusaid geavaheamis olgoriikkain go Supmii boahtti buhcciid dearvvašvuohtafuolahusa áššiin. – Áššehasaid hálidit gullat ovdamearkka dihte buohccedikšuma oažžuma gažaldagain dehe dikšuma buhtadusain, jos dikšun lea addojuvvon olgoriikkain, muitala Marika Lahtivirta.

Jos buohccát olgoriikkain

Eurohpalaš buohccedikšungoarttain oažžu dálkkasdieđalaččat vealtameahttun buohccedikšuma almmolaš dearvvašvuohtafuolahusas sihke buohcanoadjolágádusaid soahpamušdoaktáriin ja –buohcceviesuin, go mátkkošta EU- dehe Eeg-stáhtain dehe Šveiccas. Goarttain beassá dikšumii maid, jos mátkkis guhkesáiggebuozalmas gáibida fáhkka dikšuma dehe jos dárbbaša dikšuma áhpehisvuođa dehe riegádahttima geažil.

Áššehas máksá ieš dikšumis dušše áššehasmávssu, mii berrojuvvo mátkečuozáhagas. Buohccedikšuma duođalaš goluid ovddasvástádus lea Suoma stáhtas. Eurohpalaš buohccedikšungoartta sáhttá oažžut olmmoš, gean buohccedikšungoluid ovddasvástádus lea Suoma stáhtas. Mátkedáhkádus dievasmahttá eurohpalaš buohccedikšungoartta.

Eurohpalaš buohccedikšungoarta njuovžilit fierpmis

Jos áššehas ii guossástala mátkemeassain, eurohpalaš buohccedikšungoartta sáhttá diŋgot álkit ja jođánit maid fierpmis www.kela.fi/asiointi dehe nummáris 020 692 203 má–bea d. 8–17. Bálvalussii registrerejuvvo fierbmebáŋkodovddaldagaiguin dehe mobiilanannemiin.

Lassidieđut mediai:
Kommunikašuvdnaplánejeaddji Annamari Qvist, tel. 050 551 8498
Rájiid rasttildeaddji dearvvašvuohtafuolahusa kontáktačuoggá hoavda Marika Lahtivirta, tel. 040 354 7396
ovdanamma.goargu(at)kela.fi